Help
विशेष म्हणजे, नंदापूर येथील मनीषा शिवाजी खरात यांनी या ग्रंथपठणात सातत्य राखत एकही दिवस खंड पडू दिलेला नाही. गेल्या अनेक दिवसांपासून त्या नियमितपणे ‘भगवान बुद्ध आणि त्यांचा धम्म’ या ग्रंथाचे पठण करीत असून, ऑक्टोबर 2026 मधील अश्विन पौर्णिमेपर्यंत हे पठण अखंड सुरू ठेवण्याचा त्यांचा निर्धार आहे. त्यांच्या या सातत्यपूर्ण सहभागामुळे धम्मपरंपरेत निष्ठा आणि समर्पणाचे आदर्श उदाहरण निर्माण झाले आहे.
नंदापूर गावात या ग्रंथपठणाचे हे 13 वे वर्ष आहे. गेल्या तेरा वर्षांपासून सुरू असलेली ही परंपरा यंदाही त्याच श्रद्धेने आणि उत्साहाने पुढे नेली जात आहे. दररोज सायंकाळी 8.30 ते 9.30 या वेळेत जेतवन बुद्ध विहारात ‘भगवान बुद्ध आणि त्यांचा धम्म’ या ग्रंथाचे वाचन व पठण केले जाते. या वेळी गावातील उपासक-उपासिका मोठ्या संख्येने उपस्थित राहून ग्रंथाचे पठण आणि श्रवण करतात.Indian_Fast
‘भगवान बुद्ध आणि त्यांचा धम्म’ हा ग्रंथ केवळ धार्मिक वाचनापुरता मर्यादित न ठेवता भगवान गौतम बुद्धांचे विचार, धम्माची शिकवण, समता, बंधुता, करुणा, विवेक आणि मानवतावादी दृष्टिकोन समाजापर्यंत पोहोचविण्याचे माध्यम म्हणून या उपक्रमाकडे पाहिले जात आहे. दररोज होणार्या ग्रंथपठणामुळे उपासक-उपासिकांमध्ये बुद्धांच्या विचारांचे आचरण करण्याची प्रेरणा निर्माण होत आहे.
ग्रंथपठणाच्या माध्यमातून समाजातील अंधश्रद्धा, विषमता आणि भेदभाव दूर करून समतेवर आधारित समाजव्यवस्था निर्माण करण्यासाठी बुद्धांच्या विचारांची आवश्यकता अधोरेखित केली जात आहे. त्यामुळे या उपक्रमाला धार्मिकतेसोबतच सामाजिक आणि वैचारिक महत्त्वही प्राप्त झाले आहे.
13 वर्षांची अखंड धम्मपरंपरा
नंदापूर येथील जेतवन बुद्ध विहारात सुरू असलेली ही ग्रंथपठणाची परंपरा गेल्या 13 वर्षांपासून सातत्याने सुरू आहे. दरवर्षी गुरुपौर्णिमेपासून अश्विन पौर्णिमेपर्यंत ग्रंथाचे नियमित वाचन केले जाते. वर्षानुवर्षे ही परंपरा जपली जात असल्याने नंदापूर परिसरात बुद्धांच्या धम्मविचारांच्या प्रसाराचे एक महत्त्वपूर्ण केंद्र म्हणून या उपक्रमाकडे पाहिले जात आहे. ग्रंथपठणाच्या काळात उपासक-उपासिका मोठ्या श्रद्धेने सहभागी होतात. ग्रंथाचे वाचन, श्रवण आणि त्यातील विचारांचे मनन करण्याबरोबरच बुद्धांच्या धम्मानुसार जीवन जगण्याचा संकल्पही यावेळी केला जातो.
मनीषा खरात यांच्या सातत्याचे कौतुक
मनीषा शिवाजी खरात यांनी नियमितपणे ग्रंथपठणात सहभाग घेत एकही दिवस खंड पडू न देता आपले सातत्य कायम ठेवले आहे. वैयक्तिक जबाबदार्या सांभाळत त्यांनी धम्मवाचनासाठी वेळ देत ही सेवा सुरू ठेवली आहे. त्यांच्या या उपक्रमाचे नंदापूर येथील उपासक-उपासिकांकडून विशेष कौतुक होत आहे.
केवळ काही दिवस नव्हे, तर संपूर्ण तीन महिन्यांच्या कालावधीत ग्रंथपठण अखंड सुरू ठेवण्याचा त्यांचा संकल्प असून, अश्विन पौर्णिमेपर्यंत त्या नियमितपणे ग्रंथाचे वाचन करणार आहेत. त्यांच्या या सातत्यामुळे इतरांनाही धम्मवाचनासाठी प्रेरणा मिळत आहे.
अश्विन पौर्णिमेला समारोपाचा कार्यक्रम
गुरूपौर्णिमेपासुन ग्रंथ पठणास सुरुवात झाली असून गेल्या दिड महिन्यापासून सतत वाचन सुरु असून याची ऑक्टोबर 2026 मधील अश्विन पौर्णिमेपर्यंत या ग्रंथपठणाची समाप्ती होत असते. ग्रंथ समाप्तीवेळी नंदापूर गावात उपासक-उपासिकांच्या वतीने मोठ्या कार्यक्रमाचे आयोजन केले जात असते. या कार्यक्रमाला नंदापूरसह पंचक्रोशीतील नागरिक मोठ्या संख्येने सहभागी होत असतात.
यंदाही ग्रंथपठणाच्या समारोपानिमित्त विविध धम्मविषयक कार्यक्रमांचे आयोजन होण्याची शक्यता असून, बुद्धांच्या विचारांचा प्रसार, धम्माची शिकवण आणि सामाजिक समतेचा संदेश जनसामान्यांपर्यंत पोहोचविण्यावर भर दिला जाणार आहे.
भगवान बुद्धांच्या धम्मातील मानवतावादी विचार समाजाच्या प्रत्येक घटकापर्यंत पोहोचावेत आणि त्यांच्या शिकवणीचे आचरण दैनंदिन जीवनात व्हावे, या उद्देशाने नंदापूर येथील जेतवन बुद्ध विहारात सुरू असलेले हे अखंड ग्रंथपठण निश्चितच प्रेरणादायी ठरत आहे.
प्रतिनिधी
