ही कारवाई दि. ९ सप्टेंबर २०२६ रोजी सकाळी सुमारे ९ वाजता करण्यात आली. पोलीस अधीक्षकांच्या पथकाला मिळालेल्या गोपनीय माहितीच्या आधारे हसनाबाद पोलिसांच्या मदतीने राजुर येथे छापा टाकण्यात आला. राजुर येथील टेंभुर्णी रोड परिसरात इसम संदिप भुमकर, रा. राजुर हा त्याच्या गोठ्यावर मोठ्या प्रमाणात अवैध गुटखा खाली करत असल्याची माहिती पोलिसांना मिळाली होती. या माहितीच्या आधारे पोलिसांनी तत्काळ पथकासह घटनास्थळी धाव घेत छापा टाकला.
छाप्यादरम्यान गोवा, विमल, रजनीगंधा, आर.एम.डी., राजनिवास आदी कंपन्यांचा बंदी असलेला गुटखा, पानमसाला व तंबाखूजन्य पदार्थ आढळून आले. पंचांसमक्ष हा संपूर्ण मुद्देमाल जप्त करण्यात आला.
९५ लाखांचा गुटखा; वाहनेही पोलिसांच्या ताब्यात
पोलिसांनी केलेल्या कारवाईत सुमारे ९५ लाख रुपयांचा प्रतिबंधित गुटखा व तंबाखूजन्य पदार्थ जप्त करण्यात आला. याशिवाय गुटख्याची वाहतूक करण्यासाठी वापरण्यात आलेली वाहनेही ताब्यात घेण्यात आली असून त्यांची किंमत सुमारे ४० लाख रुपये असल्याचे सांगण्यात आले आहे. अशाप्रकारे एकूण १ कोटी ३५ लाख रुपयांचा मुद्देमाल जप्त करण्यात आला आहे.
या प्रकरणात संदिप भुमकर (रा. राजुर) आणि आशिष डोलतानी (रा. बु-हानपूर, मध्यप्रदेश) यांना आरोपी करण्यात आले आहे.
जिल्ह्यात गुटख्याचा एवढा मोठा साठा येतो कुठून?
जालना जिल्ह्यात यापूर्वीही पोलिसांनी अनेकदा मोठ्या प्रमाणात गुटखा व तंबाखूजन्य पदार्थांचा साठा जप्त केला आहे. मात्र प्रत्येक वेळी मोठ्या प्रमाणात माल पकडला जात असताना हा गुटखा नेमका कुठून येतो, कोण पुरवठा करतो, वाहतुकीचे जाळे कोण चालवते आणि जिल्ह्यातील किरकोळ विक्रेत्यांपर्यंत हा माल कोण पोहोचवतो, हा प्रश्न कायम आहे.
राजुर येथे तब्बल ९५ लाख रुपयांचा प्रतिबंधित गुटखा आढळणे ही साधी घटना नसून त्यामागे मोठे पुरवठा जाळे असण्याची शक्यता नाकारता येत नाही. त्यामुळे पोलिसांनी केवळ गुटखा जप्त करून प्रकरण थांबवू नये, तर या मालाचा मूळ पुरवठादार, मुख्य सूत्रधार आणि आर्थिक व्यवहार करणाऱ्यांपर्यंत तपासाची साखळी पोहोचवावी, अशी मागणी नागरिकांमधून होत आहे.
‘मुळापर्यंत’ तपासाची गरज
गुटख्याची वाहतूक करणारे वाहनचालक किंवा स्थानिक पातळीवरील व्यक्तींवर कारवाई झाल्यानंतरही जर मुख्य पुरवठादार मोकाट राहत असतील, तर अवैध गुटख्याची साखळी पूर्णपणे थांबणार कशी, असा सवाल उपस्थित होत आहे.
विशेषतः मध्यप्रदेशाशी संबंधित आरोपीचा सहभाग समोर आल्याने या प्रकरणातील गुटख्याचा पुरवठा आंतरजिल्हा किंवा आंतरराज्य पातळीवरून होत आहे का, याचाही तपास होणे आवश्यक आहे. जप्त केलेल्या वाहनांची कागदपत्रे, मोबाईल संपर्क, आर्थिक व्यवहार, माल कुठून लोड करण्यात आला आणि तो पुढे कुठे वितरित होणार होता, याचा तपास केल्यास या नेटवर्कमधील मोठी नावे समोर येण्याची शक्यता आहे.
अन्न व औषध प्रशासनाचाही सहभाग
या कारवाईत अन्न व औषध प्रशासन विभाग, जालना यांचाही सहभाग होता. त्यामुळे जप्त करण्यात आलेल्या गुटखा व तंबाखूजन्य पदार्थांची पुढील कायदेशीर प्रक्रिया आणि नमुना तपासणी याकडेही लक्ष लागले आहे.
वरिष्ठ अधिकाऱ्यांच्या मार्गदर्शनाखाली कारवाई
ही कारवाई पोलीस अधीक्षक श्री. तेघबीरसिंह संधू, अपर पोलीस अधीक्षक विक्रम साळी, उपविभागीय पोलीस अधिकारी भोकरदन डॉ. नितीन कटेकर यांच्या मार्गदर्शनाखाली करण्यात आली.
पथक प्रमुख सपोनि अविनाश गडाख, हसनाबाद पोलीस ठाण्याचे प्रभारी अधिकारी योगेश उवाळे, अन्न व औषध प्रशासन विभागाचे अधिकारी तसेच पोलीस अधिकारी व कर्मचाऱ्यांनी या कारवाईत सहभाग घेतला.
कारवाई मोठी; आता तपास किती मोठा?
जिल्ह्यातील आतापर्यंतच्या मोठ्या गुटखा कारवायांपैकी ही एक कारवाई मानली जात आहे. १ कोटी ३५ लाखांचा मुद्देमाल जप्त करण्याचे पोलिसांचे यश निश्चितच महत्त्वाचे आहे; मात्र खरी कसोटी आता तपासाची आहे.
या गुटख्याचा मूळ स्रोत कोणता? मुख्य पुरवठादार कोण? जिल्ह्यातील कोणत्या भागात माल पोहोचवला जाणार होता? या व्यवसायातून कोण आर्थिक फायदा घेत आहे? या प्रश्नांची उत्तरे तपासातून समोर येणे आवश्यक आहे.
गुटखा पकडला जातो, साठा जप्त होतो, आरोपी ताब्यात घेतले जातात; पण या अवैध धंद्याची मुळे जर कायम राहिली, तर कारवायांनंतरही गुटख्याचा पुरवठा सुरूच राहण्याची शक्यता आहे. त्यामुळे राजुर प्रकरणाच्या निमित्ताने पोलीस प्रशासन या अवैध गुटखा साखळीच्या मुळापर्यंत पोहोचणार का, याकडे आता संपूर्ण जिल्ह्याचे लक्ष लागले आहे.
Help
