जालन्यात ऐन गणेश विसर्जनाच्या दिवशी तरुणाचा खून मियांसाहेब दर्गा चौकात राहुल राजपूतवर चाकू हल्ला; उपचारादरम्यान मृत्यू

प्राथमिक माहितीनुसार, मियांसाहेब दर्गा चौक परिसरातील दर्गा रोडवर राहुल राजपूत याच्यावर दोन जणांनी धारदार चाकूने हल्ला केला. हल्ल्यानंतर दोन्ही संशयित दुचाकीवरून घटनास्थळावरून पसार झाले. गंभीर जखमी झालेला राहुल नागरिकांच्या निदर्शनास आल्यानंतर घटनेची माहिती पोलिसांना देण्यात आली. त्यानंतर जखमी राहुलला तातडीने शासकीय रुग्णालयात उपचारासाठी दाखल करण्यात आले. मात्र उपचार सुरू असतानाच त्याचा मृत्यू झाला.

Indian_Fast

घटनास्थळावरील पुरावे, प्रत्यक्षदर्शींची माहिती तसेच संशयितांकडून मिळणाऱ्या माहितीनुसार पोलिसांकडून पुढील तपास करण्यात येत आहे. हल्ल्यात वापरण्यात आलेले धारदार हत्यार, आरोपींच्या हालचाली आणि हल्ल्यापूर्वी व त्यानंतरची परिस्थिती याबाबतही तपास सुरू आहे.

राहुल राजपूतच्या मृत्यूची माहिती मिळताच लोधी मोहल्ला परिसरातील नागरिक तसेच त्याच्या नातेवाईकांनी जिल्हा शासकीय रुग्णालयात मोठी गर्दी केली. तरुणाच्या मृत्यूमुळे कुटुंबीयांवर दुःखाचा डोंगर कोसळला असून परिसरात हळहळ व्यक्त होत आहे. घटनेच्या पार्श्वभूमीवर पोलिसांनी परिस्थितीवर लक्ष ठेवले आहे.

जालना शहरात गणेश विसर्जनाचा उत्साह सुरू असतानाच सकाळच्या सुमारास तरुणाचा खून झाल्याने शहरात खळबळ उडाली आहे. मियांसाहेब दर्गा चौक तसेच लोधी मोहल्ला परिसरात घटनेनंतर काही काळ तणावाचे वातावरण निर्माण झाले होते. कायदा व सुव्यवस्था अबाधित ठेवण्यासाठी पोलिसांनी परिसरात लक्ष केंद्रित केले आहे.

दरम्यान, जालना शहरात गेल्या काही महिन्यांपासून गंभीर गुन्ह्यांच्या घटना सातत्याने समोर येत असल्याने नागरिकांमध्ये चिंतेचे वातावरण आहे. राहुल राजपूत हत्या प्रकरणातील ताब्यात घेतलेल्या संशयितांची चौकशी आणि पुढील तपासातून या घटनेमागील संपूर्ण सत्य समोर येण्याची शक्यता आहे.